Poytaxt hokimi boshchiligidagi ishchi guruhning navbatdagi tashrif manzili muayyan yashash joyiga ega bo‘lmagan shaxslar, shu jumladan nafaqat O‘zbekiston, balki qo‘shni davlatlar fuqarolari ham vaqtincha istiqomat qilishi uchun mo‘ljallangan "Mehr va saxovat" maxsus obyekti bo‘ldi.

       Sovuq mavsumda bu yerda 300 nafargacha, iliq mavsumda esa 100 nafargacha odam joylashtiriladi. Istiqomat qiluvchilarga boshpana, kuniga uch mahal issiq ovqat, shaxsni tasdiqlovchi hujjatlarni rasmiylashtirish va tibbiy yordam ko‘rsatiladi. Barcha xizmatlar bepul taqdim etiladi - Ijtimoiy himoya agentligi ko‘magida, u muhtojlarga tiklanishning barcha bosqichlarida hamrohlik qiladi.

Quyidagi masalalar muhokama qilindi:
- barqaror moliyalashtirish manbai va obyektning ishlash tizimini yaratish
- huquqiy maqom va xavfsizlikni ta’minlash
- xodimlarning shtat tarkibini shakllantirish
- davolash va tiklanishni tashkil etish
- qarindoshlarni qidirishda ko‘maklashish va ixtisoslashtirilgan muassasalarga to‘g‘ri yo‘naltirish

       Maqsad doimiy ta’minot emas, balki odamlarga tiklanish, zarur yordam olish va to‘laqonli hayotga qaytish uchun yangi imkoniyatlarga ega bo‘lishga yordam beradigan har tomonlama qo‘llab-quvvatlashdir.

© Toshkent shahar hokimligi Matbuot xizmati