Айни саратон. Куннинг тафти қуёш ботганига қарамай, ҳамон қайноқ. Мирзо Улуғбек туманидаги ҳовлиларнинг бирида таъмирлаш ишларини олиб бораётган тўрт йигитнинг иссиқдан кечки овқатга иштаҳаси ҳам бўлмади. Елвизак бўлсин деб, дераза ва эшикларни очиқ ҳолда қолдириб ухлашга қарор қилишди. Чарчашган эканми, донг қотиб ухлаб қолишди. Бу вақтда эса офтоб тафти босилгунга қадар таниши Комилжон билан чақчақлашиб ўтирган Тимур кетишга чоғланганида соат тунги йигирма учлар эди. Кондиционер тагида ўтирганида билинмаган ичкилик таъсир қилдими ёки дим ҳавоми у ўзини ёмон ҳис қила бошлади. Ўзига келиб йўлга тушганида эса соат тунги иккилардан ошганди. У бекат томон маҳалла ичидан ҳаракатланаркан дераза ва эшиги очиқ ҳовлини кўриб, бир муддат ўйланиб туриб қолди. Атрофда ҳеч ким йўғу, аммо ойнинг ёруғи гўё унинг сирини фош қилишга урингандек туюлди. Аста ичкари мўралади. Уй йўлагидан писиб бориб, хона ичкарисига кирди. Хона тўрида тўрт нафар ўзи тенги йигитлар қаттиқ уйқуда ётарди. У ён-атрофга аланглади. Ҳар бирининг ёнида уяли телефон. Худди ўз томорқасидан ҳосил тергандек, бирин-кетин телефонларни олиб чўнтакларига жойлай бошлади. Б.Нодирбекка тегишли бўлган қиймати 2.000.000 сўмлик “Samsung”, М.Муродалига тегишли нархи 1.200.00 сўмлик “Redmi Not 7”, С.Самариддинга тегишли баҳоси 1.500.000 сўмлик “Realmi”, В.Дониёрбекка тегишли 650.000 сўмлик “Redmi 7” телефонларини қўлга киритган Тимур тун қаърига шўнғиб ғойиб бўлди. Эртаси куни уларни арзон нархларда нотаниш кимсаларга сотиб юборди. Тонг саҳар усталарга қандай қурилиш материаллари кераклигини сўраш мақсадида қўнғироқ қилиб, тўрт йигитдан ҳеч бирининг телефонига тушолмаган уй эгаси, ҳойнаҳой ҳовлидаги темир-терсак, қурилиш молларини сотиб, қочиб кетган бу ярамаслар, деган шум хаёлда ҳовлиқиб уйига кириб келганида уларнинг ёш болалардек ғужанак бўлиб, ширин уйқуда ётганини кўриб, ёмон хаёлга борганидан ҳижолат тортиб кетди. Уй соҳиби йигитларни уйғотганида улар телефонларини топишолмай саросималаниб қолишди. Гап нимадалигини англаб, биргаликда туман ички ишлар органига хабар беришди. Жиноят ишлари бўйича Мирзо Улуғбек тумани суди очиқ суд мажлисида 1993 йилда туғилган, маълумоти ўрта-махсус, бўйдоқ, муқаддам икки марта судланган Ғ.Тимурнинг қилмишларига қонуний баҳо бериб, уни Ўзбекистон Республикаси Жиноят кодексининг 169-моддаси 3-қисми “а” банди (“Ўғирлик”) билан айбли деб топди. Айбланувчининг пушаймонлиги, ёши, оилавий шароитининг оғирлиги, оиланинг ягона боқувчиси эканлиги, зарарни тўлиқ қоплаганлиги, жабрланувчиларнинг даъвоси йўқлигини инобатга олиб 5 йилга озодликдан маҳрум қилиш жазосига ҳукм қилди.
Мазкур жиноят иши тафсилотлари Мирзо Улуғбек тумани ИИО ФМБ ҳузуридаги Тергов бўлими терговчиси, катта лейтенант Асилбек Рўзиевнинг иш юритувидан олинди.