Ваколатли раҳбарлар томонидан жойларда ўтказиб келинаётган шахсий ва сайёр қабуллар фуқароларнинг кўплаб муаммоларини тезкор ва қонуний ҳал қилишда ўз самарасини бермоқда. Сергели тумани ИИО ФМБ раҳбарияти томонидан туманнинг “Эски жалоир” маҳалласида ўтказилган сайёр қабули ташриф буюрган фуқароларнинг мурожаатларида келтирилган масалалар атрофлича ўрганилиб, ижобий ҳал қилиш мақсадида мутасадди ташкилот масъуллари ҳам жалб этилди. Маҳалла фуқароси А.Муҳаббатнинг яшаш хонадонига газ ҳисоблагич ўрнатиш бўйича мурожаати, Ж.Хадичанинг ичимлик сувидан қарзи бўлганлиги сабабли сувдан ўчириб қўйилгани, Б.Ироданинг олийгоҳдаги ўқишига шартнома тўловларини тўлашда моддий ёрдам кўрсатиш бўйича қилган мурожаатлари қабулхонанинг ўзида ижобий ҳал этилди. Тергов-суриштирув, мол-мулкни ундириш, оилавий низоларга тааллуқли масалалар қўшимча текширув ҳамда маълумотлар талаб қилиши боис уларнинг ижро муддатлари белгиланиб, назоратга олинди. Бу каби фуқароларнинг муаммоларига қонуний ечим топиш, уларнинг ҳақ-ҳуқуқларини кафолатлашга қаратилган жараёнлар пойтахтнинг барча туманларида амалга ошириб келинмоқда.