Пойтахтимизнинг Сергели тумани ИИО ФМБ профилактика инспектори лавозимида иш бошлаган Элёр Ташматов аҳолиси олти мингдан ортиқ бўлган “Қумариқ” маҳалласида тинчлик-осойишталикни таъминлаш, жамоат тартибини сақлаш ишларига катта масъулият билан ёндашди. Олийгоҳни тамомлаб Тошкент вилояти саноат-қурилиш коллежида ўқитувчилик қилган Элёр учун фуқаролар билан мулоқотга киришиш қийинчилик туғдирмади. Бироқ ҳужжатлар, ҳолатларга қонуний тавсиф бериш, қонунан тўғри расмийлаштириш ишларидаги оқсоқлик, билим етишмаслиги сабаб, баъзан бу ишни уддалай олмасам керак деган фикрлар ҳам кўнглидан ўтганди. Унинг иккиланиш ҳамда ишончсизлик кайфиятини устози – профилактика катта инспектори, майор Нурулло Қувонов қуёш туманни тарқатиб юборгандек тарқатиб юборди. Мана орадан кўп ўтмай капитан Элёр Ташматов туман ҲПБ бошлиғи лавозимида фаолият юритиб келмоқда. Туманда 46 та маҳалла бўлиб криминоген вазияти оғир ҳисобланган “қизил” тоифадаги 3 та маҳаллани “сариқ”қа , “сариқ” тоифадаги 6 та маҳаллани “яшилга” ўтказиш борасида қўл остидаги ходимлар билан муттасил изланишлар олиб бормоқда. Жойларда профилактика инспекторларининг маҳаллалар раислари, фаоллари, еттилиги, мутасадди ташкилотлар билан ҳамкорлигини ташкиллаштириб, мазкур гўшаларда фуқаролар хавфсизлигини таъминлаш, уларнинг мурожаатларига биргаликда ечим топиш, қонунан ҳал қилиш, эҳтиёжманд оилаларга эътибор қаратиш ишларига бош-қош. Лавҳамиз қаҳрамони мустақиллигимиз тенгдоши. Ўтган йиллар мобайнида юртимизда амалга ошириб келинаётган чуқур ўзгаришлар, юз бераётган ижобий жараёнларнинг бевосита иштирокчиси. Бу ҳақда ўзи шундай дейди:

— Мустақилликкача бўлган даврни мен ёши катталардан эшитганман. Юртимнинг ўз истиқлолига эришган йилида туғилганимдан фахрланаман. Ватанимиз озод, эркинлигимиз ўз қўлимизда. Кундан кунга ривожланиб, чирой очиб бораётган диёримиздаги тинчлик-осойишталикни келгуси авлодларга қолдиришни ҳар биримизнинг бурчимиз деб биламан.