(I-қисм)

Сирожиддин бир эмас тўрт маротаба суднинг қора курсисида ўтирган. Ўғирлик жинояти учун турли муддатларга озодликдан маҳрум қилинган. Бироқ бундан ўзига тегишли хулоса чиқармаган. Боз устига ёнига нияти бузуқ, меҳнат қилмай пул топиш илинжида бўлган Азиз, Ғайрат, Жасурбек каби шерикларни бирлаштириб жиноятга етаклади. Хавфли рецидивист мақомини олган Сирожиддин 2024 йилнинг февралида Бектемир туманида жойлашган йирик бозорлардан бирини айланиб юраркан, юк машинаси тиркамасига эътибор берди. Тиркаманинг чанг билан қопланганлиги, турар жойидан силжимаганлиги, бирор жойига инсон қўли тегмаганлиги унинг анчадан буён бу ерда қаровсиз турганлигидан дарак берарди. Аслида у ушбу тиркамани аллақачон кўз остига олган, аммо назоратсизлигига яна бир бор ишонч ҳосил қилиш учун бу ерга ташриф буюрганди. У тезда йигитлар билан боғланиб,  режаси билан бўлишди. 21 февраль куни соат 19.30 ларда улар тиркама ўзлариники эканлигига ишонтириб, миллион сўм иш ҳаққи эвазига  “КамАЗ” юк машинасини гаплашиб тиркамани олиб чиқиб кетишди. Уни металл базасига топширмоқчи бўлишганида, база хизматчиси тиркаманинг ҳужжатларини сўради. Режаси барбод бўлган йигитлар яна бир миллион сўм кира ҳаққи гаплашиб уни бошқа металл қабул  қилиш пунктига олиб боришганида билишдики, тиркамани шундайлигича топширишнинг иложи йўқ. Уни фақат бўлакларга бўлиб сотиш мумкин. Шу ниятда улар пайвандчи қидиришга тушдилар. Пайвандчи хизмат ҳақига 1.500.000 сўм сўради. Шундай қилиб 25 миллион сўмлик бус-бутун тиркама  зўр-базўр 7.500.000 миллион сўмга сотилди. Ҳайдовчилар, пайвандчига берилган чиқимлардан ташқари, шунча оворагарчилик, дахмаза, биров билиб қолишидан қўрқув-ҳадик натижасида атиги бир миллиондан пул “ишлаган” шерикларнинг ҳафсаласи пир бўлиб, алам қилгандан алам қилди. Ичидан зил кетганига қарамай Сирожиддин уларни  тинчлантиришга уринди. “Тиркама эгасиз, хотиржам бўлинглар, уни ҳеч ким қидирмайди”, дея овутишга тиришди. Бироқ йигитлар мабодо эгаси ички ишларга мурожаат қилса борми, ҳоли войлигини яхши тушунишарди. Уларнинг  хавотири бежиз эмаскан. Март ойининг илк кунларида Жасурбек Сирожиддинга қўнғироқ қилиб, тиркаманинг эгаси қидираётганлигини айтганида, унинг пайтавасига қурт тушиб, безовталаниб қолди. Тиркаманинг эгаси агар 35 миллион сўм бермаса, ички ишлар органларига мурожаат қилишини айтиб, дўқ-пўписага ўтганди. “Уч кун муҳлат сенларга, – деди қатъий тиркама эгаси Тоир. 35 миллион сўм – гап тамом”.