Тошкент шаҳар ИИББ ходимлари томонидан жамоат хавфсизлигини таъминлаш мақсадида, ноқонуний хатти-ҳаракатларга чек қўйиш, ҳуқуқбузарликлар содир этилишига сабаб бўлаётган шарт-шароитларни бартараф этиш бўйича тизимли ишлар амалга оширилмоқда. Жумладан, Янгиҳаёт тумани ИИО ФМБ ходимларининг тезкор ҳаракатлари натижасида дўкондан ўғрилик содир этган шахс аниқланиб, қўлга олинди.
Янгиҳаёт тумани ИИО ФМБга келиб тушган хабарга кўра, жорий йилнинг 1 январь куни тахминан соат 04:00 ларда, Сергели-1 даҳасидаги кўп қаватли уйнинг ертўласида жойлашган дўкондан ўғрилик содир этилган. Мазкур ҳолат юзасидан Ўзбекистон Республикаси Жиноят кодексининг 169-моддаси (“Ўғирлик”) билан жиноят иши қўзғатилган. Аниқланишича, номаълум шахс дўконнинг панжара ва эшигини бузиб кириб, жами 15.000.000 сўмлик уяли телефонлар учун мўлжалланган эҳтиёт қисмларини ўғирлаб кетган. Кўрилган чора-тадбирлар натижасида, ушбу жиноятни содир этишда гумон қилинган 28 ёшли Владимир Г. аниқланиб, қўлга олинди. Тергов давом этмоқда.